Palman Tuhan ma Bahasa Sinama

Kapangandolan Palman Tuhan

Buwattingga Kata'uwantam ya Saga Kitab maitu maka Kitab ma awal-jaman magsibu'?

Tasulat ma kitab: “Anatas palman Tuhan salama-lama.” - Isaya 40.8

Ma halam lagi' aniya' computer, kamemon kitab bay tasulat ma katas. Pat'ggol na pa'in pagsulat inān ati magkaguya' na angkan subay sinulat pabalik ma katas baha'u bo' mbal magka'at. Yuk kasehe'an, kalu bay apinda atawa bay pinindahan saga Kitab min awal.

Malaingkan aniya' bay tabāk saga sulat min Kitab Tawrat min 700 B.C. lagi'. 2700 tahun umulna! Daluwa ya saga sulat ilu maka Kitab Tawrat ya aniya' ma kita buwattina'an.

Aniya' isab saga sulat niōnan "Dead Sea Scrolls" tabāk ma 11 songab ma Isra'il. Umul saga sulat itu min 400 B.C. sampay 200 B.C. 972 heka saga sulat tabāk. Ma saga sulat itu aniya' saga ayat min kamemon jūd ma Kitab Awal-Jaman haliyu Ester. Aniya' isab ajukup Kitab Awal-Jaman, hatina Kitab Tawrat, Kitab Jabul, maka Kitab Kanabi-nabihan bay sinalin ni bahasa Girik min bahasa Hibrani. Bay iya tasalin ma saga 300 B.C. Daluwa isab iya maka ya Kitab Awal-Jaman ya ma kita buwattina'an.