Am'nnal Kami ma Palman

Dakayu' hatulan agama binogbogan e' kamemon a'a am'nnal dakayu'-kayu' du Tuhan ya na pagkahagad ma saga Kitab deyo' bay min Tuhan. Saga Kitab itu bay pinasulat e' Tuhan. Pinabukis e' Tuhan ni kita labay min saga Kitab itu addat-tabi'atna, saga panoho'anna, sampay lasana. Maitu isab tabākta ma saga Kitab ya usulan panagna'an dunya maka manusiya'. Tabākta isab kissa saga kanabi-nabihan maka pagsugsug sigām. Tahatita isab min palman Tuhan pasal saga mala'ikat maka saga ibilis, pasalan kiyamat, pasalan sulga' maka nalka' maka pasalan paghukum ma llaw damuli.

Kamemon saga pandu' itu tabāk ma Kitab Tawrat, Kitab Jabul, maka Kitab Injil. Ya sadja kaliman pasalan mbal angandol kasehe'an ustads ma saga pandu' dahū itu maka pinandu'an isab saga mulid sigām sinō' da'a amassa. Minsan ya saga a'a bay kapangandolan e' Tuhan magsalin palman Tuhan ni ginisan bahasa, suma'an ala'at panaima' e' kasehe'an. Suma'an isab sinanggupan nila'ugan atawa pinapatay. Aniya' isab kasehe'an maitu, buwattitu panaima' sigām ma pasalan website itu. Insha-Allah, katabangan kami sigām supaya apinda pikilan sigām ma pasalan palman itu min Tuhan.

Ya maksud kami ma website PalmanTuhan.com itu, amat'nna' saga Kitab bay tasulat e' si Nabi Musa, si Nabi Da'ud, maka saga kanabi-nabihan sampay ya Kitab pasal si Nabi Isa ya Al-Masi bo' tabassa maka tata'u e' kamemon Kasamahan. Aholat kami aheya katabanganna saga palman itu ma kamemon Bangsata maka tausal pamandu' atawa pagammal ni Tuhan. Mura-murahan tahinang itu palsababan bo' pasōng lagi' hāp addat-tabi'at maka kaul-pi'il Bangsata ni pagkahi sigām.

Share